LML

តើជំនាញព័ត៌មានវិទ្យាគឺជាអ្វី?

ព័ត៌មានវិទ្យា ឬ Information Technology ដែលហៅកាត់ថា IT នោះ គឺជាជំនាញមួយដែលសិក្សាអំពីការប្រើប្រាស់នូវបច្ចេកវិទ្យា និងប្រព័ន្ធកុំព្យូទ័រដើម្បីធ្វើការគ្រប់គ្រងទីន្នន័យនិងដំណើរការទៅលើព័ត៌មានផ្សេងៗ។ ព័ត៌មានវិទ្យា គឺជាការសិក្សាទៅលើផ្នែកធំៗនៃបច្ចេកវិទ្យាដូចជា Hardwares របស់កុំព្យូទ័រ Softwares របស់កុំព្យូទ័រ ការតបណ្ដាញនិងគមនាគមន៍ ការគ្រប់គ្រងទិន្នន័យ ការសរសេរ Code បង្កើតកម្មវិធី ការរក្សាប្រព័ន្ធសុវត្ថិភាពទៅលើប្រព័ន្ធព័ត៌មាន និង ការគ្រប់គ្រងគម្រោងផ្សេងៗផងដែរ។

ហេតុអ្វីគួរជ្រើសរើសជំនាញព័ត៌មានវិទ្យា?

មានហេតុផលមួយចំនួនដែលអ្នកគួរជ្រើសរើសជំនាញព័ត៌មានវិទ្យា។ ទាំងនេះជាហេតុផលដែលអ្នកគួរជ្រើសរើសយកជំនាញព័ត៌មានវិទ្យា៖

តម្រូវការខ្ពស់ ជំនាញព័ត៌មានវិទ្យាគឺកំពុងតែមានតម្រូវការច្រើននៅក្នុងសង្គមនាពេលបច្ចុប្បន្ន ពីព្រោះរាល់ក្រុមហ៊ុន មុខជំនួញ និង អាជីវកម្ម សុទ្ធសឹងតែប្រើប្រាស់បច្ចេកវិទ្យាដើម្បីសម្រួលដល់ការគ្រប់គ្រង និង ការរីកចម្រើនរបស់ក្រុមហ៊ុន មុខជំនួញ និង អាជីវកម្មទាំងនោះ។ ដូច្នេះហើយ ឱកាសការងារនៅក្នុងជំនាញព័ត៌មានវិទ្យាគគឺមានច្រើន។
ប្រាក់ចំណូលខ្ពស់ ជំនាញព័ត៌មានវិទ្យាអាចធ្វើឲ្យអ្នកមានចំណូលឬប្រាក់បៀរវត្សខ្ពស់។ ដោយយោងទៅតាម The US Bureau of Labor Statistics ក្នុងឆ្នាំ ២០២១ បានបង្ហាញថា ប្រាក់បៀរវត្សក្នុងជំនាញព័ត៌មានវិទ្យាមានចំនួន ៩១ ២៥០ ដុល្លារ។
ឱកាសការងារ ជំនាញព័ត៌មានវិទ្យាអាចធ្វើឲ្យអ្នកទទួលបានការងារនៅក្នុងផ្នែកបច្ចេកវិទ្យានិងវិទ្យាសាស្ត្រ ទៅលើការដោះស្រាយបញ្ហា និង ការបង្កើតជាដំណោះស្រាយឲ្យកាន់តែមានលក្ខណៈងាយស្រួលនៅក្នុងការរស់នៅ។
អថិភាពនៅក្នុងវិស័យការងារ ជំនាញព័ត៌មានវិទ្យាអាចធ្វើឲ្យអ្នកមានអថិភាពកក្នុងកការជ្រើសរើសប្រភេទការងារដែលខ្លួនចង់បាន ក្រោយពីបញ្ចប់ការសិក្សាលើជំនាញនេះរួច អាស្រ័យទៅលើចំណង់ចំណូលចិត្ត និង ជំនាញផ្ទាល់ខ្លួន ដូចជាការបម្រើការងារនៅក្នុងវិស័យរដ្ឋ និង ឯកជន ជាពិសេសគឺការធ្វើការដោយខ្លួនឯង(ឯករាជ្យ)។
ស្ថិរភាពការងារ ព័ត៌មានវិទ្យា គឺជាជំនាញមួយដែលត្រូវបានគេរំពឹងគិតថា នឹងបន្ដមានការអភិវឌ្ឍ និង រីកចម្រើនទៅមុខជានិរន្ដ ដែលនេះបានបង្ហាញថា ការងារនៅក្នុងជំនាញព័ត៌មានវិទ្យា គឺនឹងមានស្ថិរភាព។

តើមានជំនាញអ្វីខ្លះនៅក្នុងវិស័យព័ត៌មានវិទ្យា ឬ IT?

នៅក្នុងវិស័យព័ត៌មានវិទ្យា ឬ IT មិនមែនមានតែមួយជំនាញមួយមុខដូចជាការសរសេរកូដបង្កើតកម្មវិធីនោះទេ។ ជាក់ស្ដែង ពាក្យថា ព័ត៌មានវិទ្យា ឬ IT គឺមានការបែងចែកជាជំនាញតូចៗនៅក្នុងនោះបន្ថែមទៀត ដូចជា វិស្វកម្មសហ្វវែរ (Software Engineering/Development) ការតបណ្ដាញនិងរក្សារការពារនូវប្រព័ន្ធសុវត្ថិភាព (Networking and Cyber Security) និង ការឌីស្សាញ (Media/Design) ជាដើម។

តើអ្វីទៅជាជំនាញវិស្វកម្ម ឬ ការអភិវឌ្ឍសហ្វវែរ?
ចុះអ្វីទៅជាជំនាញតបណ្ដាញនិងការពារប្រព័ន្ធសុវត្ថិភាពនោះ?
ហើយចុះ ជំនាញឌីស្សាញវិញ?

Software Engineering/Development

ជំនាញវិស្វកម្មឬអភិវឌ្ឍសហ្វវែរ គឺជាជំនាញមួយនៅក្នុងវិស័យព័ត៌មានវិទ្យាដែលផ្ដោតទៅការរចនា និងការបង្កើតជាប្រព័ន្ធសហ្វវែរដូចជា ការបង្កើតជាកម្មវិធីទូរស័ព្ទដៃ កម្មវិធីកុំព្យូទ័រ គេហទំព័រ ហ្គេម ការផ្ទុកទិន្នន័យជាដើម។ ជំនាញនេះសិក្សាផ្ដោតទៅលើការសរសេរកូដដើម្បីបង្កើតទៅជាសហ្វវែរផ្សេងៗដូចដែលបានរៀបរាប់ខាងលើ។
បន្ទាប់ពីបញ្ចប់ការសិក្សាលើជំនាញនេះរួច អ្នកនឹងអាចក្លាយជា អ្នកបង្កើតកម្មវិធីទូរស័ព្ទដៃ អ្នកបង្កើតកម្មវិធីកុំព្យូទ័រ អ្នកបង្កើតគេហទំព័រ អ្នកបង្កើតហ្គេម អ្នកជំនាញនៅក្នុងការផ្ទុកទិន្នន័យ ជាដើម។
នាពេលបច្ចុប្បន្ន ជំនាញវិស្វកម្មឬអភិវឌ្ឍសហ្វវែរ គឺកំពុងតែមានការរីកចម្រើនយ៉ាងខ្លាំងជាមួយនឹងតម្រូវការការងារខ្ពស់ជាមួយនឹងអ្នកធ្វើការដែលមានជំនាញ។ ដោយយោងទៅតាម the US Bureau of Labor Statistics, អត្រាការងាររបស់ Software developer អាចនឹងមានការកើនឡើងចំនួន ២២% ពីឆ្នាំ ២០២០ ទៅ ២០៣០។ ដើម្បីទទួលបានអាជីពការងារក្នុងជំនាញនេះ អ្នកត្រូវតែបញ្ចាប់ការសិក្សាថ្នាក់បរិញ្ញាបត្រឬជំនាញខាងផ្នែក វិទ្យាសាស្ដ្រកុំព្យូទ័រ ឬ ផ្សេងទៀត ដែលជាជំនាញពាក់ព័ន្ធនឹង Programming ឬ Software Development Tools។

Networking and Cyber Security

ជំនាញតបណ្ដាញនិងការពារប្រព័ន្ធសុវត្ថិភាព គឺជាជំនាញព័ត៌មានវិទ្យាមួយដែលសិក្សាអំពីដំណើរការនៃប្រព្រឹត្តទៅនៃការផ្ទេរ និងផ្ទុកទិន្នន័យ ការតភ្ជាប់បណ្ដាញកុំព្យូទ័រជាប្រព័ន្ធ ជាពិសេសនោះគឺការបន្ថើមទៅលើការសិក្សាស្ដីពីហានិភ័យដែលអាចកើតឡើងចំពោះផ្នែកប្រព័ន្ធសន្ដិសុខរបស់កុំព្យូទ័រ ការស្វែងរកដំណោះស្រាយ និងការការពារពីការវាយប្រហារតាមរយៈប្រព័ន្ធបច្ចេកវិទ្យាផងដែរ។
បន្ទាប់ពីបញ្ចប់ការសិក្សាលើជំនាញនេះរួច អ្នកនឹងអាចក្លាយជា វិស្វករផ្នែក អ្នកជំនាញក្នុងការរៀបចំនិងតបណ្ដាញកុំព្យូទ័រ អ្នកវិភាគទៅលើប្រព័ន្ធសុវត្ថិភាព អ្នកការពារប្រព័ន្ធសុវត្ថិភាពពីការវាយប្រហារផ្សេងៗ ជាដើម។
សព្វថ្ងៃនេះ ជំនាញតបណ្ដាញនិងការពារប្រព័ន្ធសុវត្ថិភាព គឺកំពុងតែមានការរីកចម្រើនយ៉ាងខ្លាំងជាមួយនឹងតម្រូវការការងារខ្ពស់ជាមួយនឹងអ្នកធ្វើការដែលមានជំនាញ។ ដោយយោងទៅតាម the US Bureau of Labor Statistics, អត្រាការងាររបស់ Software developer អាចនឹងមានការកើនឡើងចំនួន ៣៣% ពីឆ្នាំ ២០២០ ទៅ ២០៣០។ ដើម្បីទទួលបានអាជីពការងារក្នុងជំនាញនេះ អ្នកត្រូវតែបញ្ចាប់ការសិក្សាថ្នាក់បរិញ្ញាបត្រឬជំនាញខាងផ្នែក វិទ្យាសាស្ដ្រកុំព្យូទ័រ ឬ ផ្សេងទៀត ដែលជាជំនាញពាក់ព័ន្ធនឹង Networking និង Cyber Security។

Design

ជំនាញឌីស្សាញ គឺជាជំនាញមួយដែលសិក្សាផ្ដោតទៅលើការបង្កើត និង រចនាទៅលើមាតិកាឌីជីថល រួមមាន ផ្នែករូបភាព វីដេអូ សម្លេង។ ឧទាហរណ៍៖ ការរចនាផ្ទាំងផ្សព្វផ្សាយពាណិជ្ជកម្មនៅតាមបណ្ដាញសង្គម ការបង្កើតជាLogo ការផលិតវីដេអូ...។
បន្ទាប់ពីបញ្ចប់ការសិក្សាលើជំនាញនេះរួច អ្នកនឹងអាចក្លាយជា Graphics Designer អ្នកបង្កើតAnimation អ្នកជំនាញកាត់ត និង បង្កើតវីដេអូ អ្នកជំនាញទៅលើផ្នែកសម្លេង UI/UX Designer ជាដើម។
សព្វថ្ងៃនេះ ជំនាញតបណ្ដាញនិងការពារប្រព័ន្ធសុវត្ថិភាព គឺកំពុងតែមានការរីកចម្រើនយ៉ាងខ្លាំងជាមួយនឹងតម្រូវការការងារខ្ពស់ជាមួយនឹងអ្នកធ្វើការដែលមានជំនាញ។ ដោយយោងទៅតាម the US Bureau of Labor Statistics, អត្រាការងាររបស់ Software developer អាចនឹងមានការកើនឡើងចំនួន ១៣% ពីឆ្នាំ ២០២០ ទៅ ២០៣០។ ដើម្បីទទួលបានអាជីពការងារក្នុងជំនាញនេះ អ្នកត្រូវតែបញ្ចាប់ការសិក្សាថ្នាក់បរិញ្ញាបត្រឬជំនាញខាងផ្នែក Graphics Design និង មានសមត្ថភាពក្នុងការប្រើប្រាស់នូវ Designing Tools។